Psalms 44

Suŋuuŋ to saawe tau yes Israela koiazŋa tiliiv zi

Mbouŋ to yes Kora

1Maaron, muuŋ saawe to timbumaiŋa, yo ughamgham uraat tintiina pazi.
Tauta tisisinaia ilam ilam le aazne, yei nilooŋa pa taumai taliŋamai paam.

2Yes nugh nugh tau muuŋ tileep izi taan tane, ila taum tapirim, yo uziir zi tighau tila,
ve upalepoghai timbumaiŋa tileep izi taan tane gha imin lezi motot.
Yo utatan yes Kanaana le tapirizi isov kat, ve ugham timbumaiŋa tileep poia izi taan tane. ^a

3Onoon, timbumaiŋa tigham malmal pa taan tane.
Eemon tauzi tapirizi ve mbuzaagh toozi igham zi tiliiv koiazŋa ne mako.
Yo uleep tomani zi ve matam pazi, ve utotoi tapirim pa koiazŋa ve uparav tomani zi.
Tauta timbumaiŋa tiliiv zi, ve tigham taan toozi imin lezi.
Pasaa, yo lolom pazi kat. ^b
4Yoova, yo kinik tsiau ve Maaron tsiau.
Yo usaav ariaaŋ ughe yei Israela tau siŋ to Yakop pale niliiv koiamaiŋa.

5Ila yo tapirim, yei nitatan koiamaiŋa.
Yei nighur ilat tsio, ve suŋuuŋ tsiei iŋaŋarui ghom. Tauta yo uul ghei, ve nirav zi ve nivaghaaz zi ila aghemai saamba.
6Yau nanumeer paneegh tsiau mako.
Ve mbuzaagh tsiau paam, ene irau igham mulin ghau mako.
7Yo mon ta uluul ghei, ve ughamgham mulin ghei ila koiamaiŋa nimazi.
Yo ugham zi tivaghamgham, ve tighau tila toman mayazi.

8Maaron, yo uluul ghei, tauta monmon nipapakur ghom, ve lolomai poia payo.
Yei aat nipait ezam taghon taghon gha ila. ^c
9Eemon aazne, yo ughur murim payei, ve upaak zaaba tsiei muul mako.
Ve upul koiamaiŋa tiliiv ghei le mayamai kat.

10Yo ugham ghei tapirimai imbool.
Tauta nipul malmal ve nighawaar, ve koiamaiŋa tiyauur gabua tsiei isov.

11Yo ughur ghei nila nimazi, imin sipsip tau timbit zi pa ravuuŋ zi.
Ve ureu ghei nimbiriis irau nugh nugh.

12Yei tamtamon tsio. Eemon aazne, ugholia ghei nila koiamaiŋa nimazi gha nimin besooŋa pazi.
Ve ugham gabua tiina eta ila nimazi mako. Yo ughur atuyamai izi geeg, imin yei kaut sorok.

13Yes tau tileep tigharau ghei na, tighita ŋgar tau yo ugham payei,
le tiŋiŋ ve tigham ŋalalaŋ payei.

14Yes nugh nugh tau tiwatagh ghom mako na, tighit ghei nimin mogheraaŋ.
Ve tiŋiŋiŋ payei, ve tililiit dabazi.
15Saawe isov, mboŋoozo ila le ravrav izi, tamtamon tipapamayaŋin ghau.
Tauvene matag izaa mako. Mayag, ve natudtud mon.

16Pasaa, tamtamon tighita ŋgar tau koiagŋa tiyoli payau na,
ve tisiksik saveeŋ veleghiiŋ ve saveeŋ mayaŋa naol payau.
17Yau nagham ŋgar naol naghe puughu mindai ta yo upul pataŋani naol tane ivot payei?
Pasaa, yei lolomai iveghai ghom mako.
Ve saveeŋ tau nimbua tomani ghom na, yei nireua mako.

18Yei nighur murimai payo mako.
Ve laghooŋ tsiei, nisosor pa eez tsio mako.

19Eemon yo uvaghamun ghei kat, le nugh tsiei ŋginaaŋa imin gabua sagsagŋa niazi to lepoogh.
Lepoogh tsiei, ene imin ndoroom tiina ikau ghei.

20Maaron tsiei, yo uwatagh: Lolomai iveghai ghom mako,
ve nisuŋ pa maaron karom eta mako.
Imin ta nigham ŋgar tauvene, kanaŋ yo uwataghi.
Pasaa, ŋgar ŋgozaaŋa isov tau igheen ila lolomai ne, eta iyooŋ payo mako.

22Yei nibesbees pa yo mon. Tauta mboŋoozo ila le ravrav izi, koiamaiŋa tiravrav ghei nimatmaat.
Tighit ghei nimin sipsip tau timbit zi pa ravuuŋ zi. ^d
23Yoova, ugheen irao! Uburig!
Ugham ŋgar eta to uul ghei lak!
Pale ughur murim payei tauvene taghon taghon gha ila?

24Puughu mindai ta uŋgooz naghom payei?
Ughita. Koiamaiŋa titatan ghei gha nisaghat wa. Pataŋani tiina tau nibadbaado ne, lolom iveegh pani sov!

25Aazne, koiamaiŋa titatan ghei kat.
Tauvene nitap nizi taan ve nigheen ila ŋgaupup loolo.

26Maaron, uburig! Ulam uul ghei lak!
Yo lolom isaghav tamtamon tsio ariaaŋ ve uluul zi.
Tauvene upas ghei nivot pa pataŋani tane.